නවතම පුවත් සහ සිදුවීම්

 විශ්‍රාම වැටුප් දෙපාර්තමේන්තුවෙහි වැන්දඹු අනත්දරු අංශයෙහි වසර හයකට ආසන්න කාලයක් සහකාර අධ්‍යක්ෂවරයා ලෙස කටයුතු කළ කේ.කේ පත්මසිරි මහතා සහ විශ්‍රාම වැටුප් දෙපාර්තමේන්තුවෙහි මධ්‍යගත සහ විමධ්‍යගත විශ්‍රාම වැටුප් අංශයන්හි සහකාර අධ්‍යක්ෂවරයා ලෙස කටයුතු කළ ඩබ්.ජී.ඩබ් ඥානදයාලන් මහතා වාර්ෂික ස්ථාන මාරු ලබා පසු ගිය දා විශ්‍රාම වැටුප් දෙපාර්තමේන්තු සේවයට සමු දුන්නේය. ශ්‍රී ලාංකික විශ්‍රාමික ප්‍රජාව ඇතුළු ඔවුන්ගේ උරුමකරුවන්ගේ ප්‍රතිලාභ ලබා දීමේ දී ඒ හා සබැඳි ලිපිගොණු පිලිබඳව මානුෂීය දෘශ්ටියකින් යුතුව ගණුදෙනු කරමින් වැන්දඹු අනත්දරු අංශයෙහි සේවාවන් සංවර්ධනයෙහි ලා විශාල කැපවීමක් සිදු කළ කේ.කේ පත්මසිරි මහතා ආගමන හා විගමන දෙපාර්තමේන්තුවෙහි සහකාර අධ්‍යක්ෂවරයකු ලෙස පත්ව ගියේය. එමෙන්ම විශ්‍රාම වැටුප් දෙපාර්තමේන්තුවෙහි මධ්‍යගත සහ විමධ්‍යගත අංශයන්හි සහකාර අධ්‍යක්ෂවරයා ලෙස කටයුතු කරමින් විශ්‍රාමිකයන් ලියාපදිංචි කිරීම් සහ ගණන් බැලීමේ ක්‍රියාවලින් වේගවත් සහ කඩිනම් කිරීමට දායක වූ ඩබ්.ජී.ඩබ් ඥානදයාලන් මහතා මැතිවරණ කොමිෂන් සභාවෙහි සහකාර මැතිවරණ කොමසාරිස්වරයකු ලෙස පත් වීම් ලැබ විශ්‍රාම වැටුප් දෙපාර්තමේන්තු සේවයෙන් නික්ම ගියේය. විශ්‍රාම වැටුප් දෙපාර්තමේන්තු ශ්‍රවණාගාරයේ දී පැවති සමුගැනීමේ උළෙල සඳහා විශ්‍රාම වැටුප් අධ්‍යක්ෂ ජනරාල්තුමන්, විශ්‍රාම වැටුප් අතිරේක අධ්‍යක්ෂ ජනරාල්තුමන්, ප්‍රධාන ගණකාධිකාරිතුමන් ඇතුළු මාණ්ඩලික නිලධාරීන් හා විශ්‍රාම වැටුප් දෙපාර්තමේන්තුවේ අනෙකුත් නිලධාරීන් බොහෝ පිරිසක් සහභාගී විය.  

  විශ්‍රාම වැටුප් දෙපාර්තමේන්තුව මඟින් කලමනාකරණය කරනු ලබන රාජ්‍ය සේවකයන්ගේ පවූලේ සාමාජිකයන් සඳහා වන වැන්දඹු අනත්දරු විශ්‍රාම වැටුප් ක්‍රමය යටතේ වැන්දඹු අනත්දරු ගෙවීම් සක්‍රීය කිරීමේ ක්‍රියාවලිය    තවදුරටත් සරල කිරීමට තීරණය කර ඇත. ඒ අනුව නව ක්‍රමවේදය පිළිබද පැහැදිලි කරමින් විශ්‍රාම වැටුප් චක්‍රලේඛ 03/2020 මගින් සියලුම ප්‍රාදේශීය ලේකම්වරුන් හා සියලුම රජයේ නිලධාරීන් වෙත උපදෙස් නිකුත් කර    ඇත. 

 “සෞභාග්‍යෙය් දැක්ම “ ජාතික ප්‍රතිපත්ති ප්‍රකාශය අනුව තොරතුරු තාක්ෂණය මත පදනම් වු සමාජයක් ගොඩනැගීම අරමුණු කරගෙන විශ්‍රාමිකයන්ට හා ඔවුන්ගේ පවුල්වල සාමාජිකයන්ට රජයෙන් සපයන සේවාවන්       වඩාත් පහසු හා කාර්යක්ෂම කිරීමේ අරමුණ ඇතිව නව වැඩපිළිවෙල ක්‍රියාත්මක වේ.නව ක්‍රමය යටතේ විශ්‍රාම ලබමින් සිටි විශ්‍රාමිකයෙකු මියගිය විට ඔහු/ ඇය වෙනුවෙන් විශ්‍රාම වැටුප ආරම්භ කිරීම සඳහා අනුමැතිය   ලබාදීමේ බලතල ප්‍රාදේශීය ලේකම් වෙත පවරා ඇත. ඒ අනුව ප්‍රාදේශීය ලේකම් විසින් වැන්දඹුවගේ / අනත්දරුවන්ගේ හිමිකම තහවුරු කරගෙන ඔවුන් සඳහා වැන්දඹු අනත්දරු විශ්‍රාම වැටුප සක්‍රිය කිරීමට අනුමැතිය   තොරතුරු තාක්ෂණ පද්ධතියක් හරහා තහවුරු කල යුතු වේ.

 මෙමගින් වැන්දඹු අනත්දරු අයදුම්පත් විශ්‍රාම වැටුප් දෙපාර්තමේන්තුව වෙත ගෙන්වාගෙන සක්‍රිය කිරීමට ගත කරන කාලය අවම කිරීමට කටයුතු කෙරෙන අතර   වැන්දඹු අනත්දරු සාමාජිකයා ඔහුගේ කාලත්‍රයා මියගිය   දිනට පසු මාසයේ සිටම වැන්දඹු අනත්දරු විශ්‍රාම වැටුප් ලබාගැනීමට හැකියාව ලැබේ.මීට අමතරව රාජකාරීයේ යෙදි සිටියදී මියයන නිලධාරීන් සඳහා වැන්දඹු   අනත්දරු විශ්‍රාම වැටුප සක්‍රිය කිරීමද හදුන්වාදෙන නව තොරතුරු තාක්ෂණ මොඩියුලය ඔස්සේම සිදු කිරීමට උපදෙස් නිකුත් කර ඇති අතර ඒ අනුව මාර්ගගත අයදුම්පත් විශ්‍රාම වැටුප් දෙපාර්තමේන්තුවට යොමු කල යුතු     වේ.

නව ක්‍රමවේදය ක්‍රියාත්මක කිරීම 2020.03.15 දින සිට ක්‍රියාත්මක වේ.