forigen pen21

 

 

 

 

 

 

 

 

 

 

 

 

 

ආර්ථික වශයෙන් අභියෝගාත්මක කාල සීමාවක් ගත කරමින් සිටින අවස්ථාවේ ශ්‍රී ලාංකික විශ්‍රාමික ප්‍රජාවගේ ආර්ථික සුබ සාධනය කෙරෙහි අවධානය යොමු කරමින් විශ්‍රාම වැටුප් දෙපාර්තමේන්තුව හා ප්‍රමුඛ පෙළේ සුපිරි වෙළැඳසැල් ජාලයක් වන කාර්ගිල්ස් ආයතනය ඒකාබද්ධ වී විශ්‍රාමිකයන් වෙත ආර්ථික සහන රැසක් ලබා දීමේ වැඩපිළිවෙල ප්‍රශංසනීය බව රාජ්‍ය සේවා පළාත් සභා සහ පළාත් පාලන අමාත්‍ය ගරු ජනක බණ්ඩාර තෙන්නකෝන් මැතිතුමන් පවසනු ලැබීය.

ගරු ජනක බණ්ඩාර තෙන්නකෝන් මැතිතුමන් මේ බව ප්‍රකාශ කළේ විශ්‍රාමිකයන් සඳහා සහන ලබා දීම වෙනුවෙන් විශ්‍රාම වැටුප් දෙපාර්තමේන්තුව හා කාර්ගිල්ස් ආයතනය සමඟ වන ගිවිසුම සංකේතාත්මකව හුවමාරු කර ගැනීම හා විශ්‍රාමික සුභ සාධක වැඩසටහන ආරම්භ කිරීම සම්බන්ධයෙන් 2022.03.10 එනම් අද දින පැවති මාධ්‍ය හමුව අතරතුර දී ය.

මෙම වැඩසටහන යටතේ කාර්ගිල්ස් ආයතන මඟින් විශ්‍රාමිකයන් සඳහාම විශේෂිත වූ සහන රැසක් ලබා දීම සිදුකරයි. ඒ අනුව ඕනෑම විශ්‍රාමිකයකුට දිවයින පුරා පිහිටි කාගිල්ස් සුපිරි වෙළඳ සැල් සහ ෆාමසි 480 ක් අතරින් ඕනෑම වෙළඳසැලක ට ගොඩ වී අතිවිශේෂ වට්ටම් යටතේ ගණුදෙනු කිරීමට හැකියාව ලැබේ. මෙම වැඩසටහන ඔස්සේ විශ්‍රාමිකයන් සඳහා කාර්ගිල්ස් අනුබද්ධ සුපිරි වෙළඳසැල් ජාලයේ ඕනෑම වෙළඳසැලකින් භාණ්ඩ මිලදී ගැනීමේ දී බිල්පතෙහි මුළු එකතුව සඳහා (Total Bill) 5% ක වට්ටමක් ලබා දීම මෙහි දී සිදු වෙයි. රු 1500 කට වැඩි අවම මිලදී ගැනීමක් සඳහා මෙම වට්ටම අදාළ වන අතර මසකට උපරිම මිලදී ගැනීමේ සීමාව රු 15,000 කි. සෑම මාසයක දීම සහ විශේෂයෙන් විශ්‍රාම වැටුප් සතිය තුළ විශ්‍රාමිකයන්ට තෝරාගත් වෙළඳ නිෂ්පාදන සඳහා විශේෂ වට්ටම් පිරිනැමීමට ද මේ යටතේ කටයුතු කර තිබීම විශේෂත්වයකි.

වැඩි අලෙවියක් සහිත නිෂ්පාදන මෙන්ම විශ්‍රාමිකයන් සඳහා අත්‍යාවශ්‍ය ද්‍රව‍ය ලෙස සැලකෙන සෞඛ්‍ය හා පෝෂණ නිෂ්පාදන කෙරෙහි එම වට්ටම් අදාළ වනු ඇත.

කාර්ගිල්ස් සමූහයට අයත් KFC ජාලය,සිනමාහල් මෙන්ම කාර්ගිල්ස් බැංකු යටතේ ද සුවිශේෂී සහන හඳුන්වා දීමට කටයුතු කර තිබේ. මේ අනුව KFC අවන්හල් ඔස්සේ විශ්‍රාමිකයන් සිදු කරන රු 5000 ට වැඩි බිල්පත් සඳහා 10% ක වට්ටමක් හිමි වේ. කාර්ගිල්ස් සමූහ ව්‍යාපාරයට අනුබද්ධ Ceylon Theater සිනමා හල් වලින් ද ටිකට්පත් මිල දී ගැනීමේ දි 25% ක වට්ටමක් පිරිනැමීමට ද කටයුතු කරනු ලබයි.

එමෙන්ම මෙම වැඩසටහන ඔස්සේ මාසික විශ්‍රාම වැටුප කාර්ගිල්ස් බැංකුව හරහා ලබා ගන්නා විශ්‍රාමිකයන් සඳහා ප්‍රතිලාභ රැසක් ලබා දීමට පියවර ගෙන තිබේ.

විශ්‍රාමිකයන් සඳහා වූ මෙම සහන පැකේජය 2022.03.10 වැනි දින සිට ක්‍රියාත්මක වන අතර විශ්‍රාමිකයන්ට දිවයින පුරා කාර්ගිල්ස් ආයතන වෙතින් මෙම ප්‍රතිලාභ ලබා ගැනීමට ඒ අනුව හැකියාව පවතී.

මෙම මාධ්‍ය හමුවට රාජ්‍ය සේවා, පළාත් සභා හා පළාත් පාලන අමාත්‍ය ගරු ජනක බණ්ඩාර තෙන්නකෝන් මැතිතුමන්, එම අමාත්‍යාංශයේ ලේකම් ජේ ජේ රත්න්සිරි මහතා ජ්‍යෙෂ්ඨ උපදේශක මහින්ද මඩිහේවා මහතා ඇතුළු අමාත්‍යාංශයේ නිලධාරීන්, කාර්ගිල්ස් ආයතනයේ කළමනාකරණ අධ්‍යක්ෂ අශෝක පීරිස් මහතා, අලෙවි ප්‍රධානි සංජීව ප්‍රනාන්දු මහතා ඇතුළු නිලධාරීන් සහ විශ්‍රාම වැටුප් අධ්‍යක්ෂ ජනරාල් ඒ.ජගත් ඩී ඩයස් මහතා, අතිරේක අධ්‍යක්ෂ ජනරාල් ඩී.එම්.පී ජයවර්ධන මහතා ඇතුළු දෙපාර්තමේන්තු නිලධාරීන් එක් විය.

          

             
               
 

forigen pen21forigen pen21

2022.01.19 දිනැති සහ අංක 2263/5 දරණ රජයේ අති විශේෂ ගැසට් පත්‍රය මඟින් විශ්‍රාම වැටුප් ව්‍යවස්ථා සංග්‍රහයේ "2අඅ" සහ "17" වැනි වගන්ති සම්පූර්ණයෙන් ඉවත් කර රාජ්‍ය නිලධාරින් අනිවාර්ය විශ්‍රාම ගැන්වීමේ වයස අවුරුදු 65 දක්වා දීර්ඝ කිරීමට අදාළව විශ්‍රාම වැටුප් ව්‍යවස්ථා සංග්‍රහය තවදුරටත් සංශෝධනය කර ඇත.

එමඟින් විශ්‍රාම වැටුප් ව්යවස්ථා සංග්‍රහයේ 'ට' උපලේඛනය යටතේ විශ්‍රාම ගැන්වෙන නිලධාරින් විශ්‍රාම ගැන්වෙන කාල සීමාව,ඔවුන්ගේ වැටුප් පරිමාවන් ගණනය සහ සංශෝධනය වන ආකාර පිළිබඳ නව සංශෝධන රැසක් සිදු කර තිබේ.
 
එමෙන්ම වයස අවුරුදු පනස් පහ සම්පුර්ණ වූ පසු ඕනෑම රාජ්‍ය සේවකයකුට සිය අභිමතය පරිදි විශ්‍රාම ගැන්වීමට මෙමඟින් අවස්ථාව ලබා දී ඇත. නිසි බලධාරියකු විසින් සේවයේ රඳවා තබා ගන්නා හෝ ආණ්ඩුක්‍රම ව්‍යවස්ථා මඟින් හෝ වෙනත් නීතියක් මඟින් අනිවාර්ය විශ්‍රාම ගැන්වීමේ වයස  නිශ්චිතව තීරණය කර ඇති නිලධාරින් හැර සියලුම සිවිල් රාජ්‍ය නිලධාරින් වයස අවුරුදු 65 න් විශ්‍රාම ගැනීම අනිවාර්ය කෙරෙන පරිදි විශ්‍රාම වැටුප් ව්‍යවස්ථා සංග්‍රහය සංශෝධනය කර තිබේ.
 
 

forigen pen21

විශ්‍රාම වැටුප් දෙපාර්තමේන්තුවේ සේවය ලබා දෙන සියලු විශ්‍රාමිකයන් ඇතුළු ලංකාවාසී සියලුම ජනතාව වෙත ලැබූ නව වසර නීරෝගිමත් සහ සෞභාග්‍යමත් වසරක් වේවා යැයි ප්‍රථමයෙන් සුභාශිංසන එක් කරමි. කොවිඩ්-19 වසංගත තත්ත්වය හමුවේ වැඩියෙන්ම අවධානමට ලක් වූයේ ජ්‍යෙෂ්ඨ පුරවැසි  ප්‍රජාවයි.එම අවස්ථාවේ වැඩිහිටි ප්‍රජාව වෛරස අවදානමෙන් ආරක්ෂා කරගැනීම කෙරෙහි ඉහළම අවධානය ලබා දුන් සහ එන්නත්කරණයේ දී ද ඔවුන් වෙත ප්‍රමුඛතාවය ලබා දී කටයුතු කළ සියලු පාර්ශවයන් වෙත කෘතඥතාවය පිරිනැමීමට මෙය අවස්ථාවක් ගනිමි.

2022 නව වසර උදා වන විට මෙරට සමස්ත විශ්‍රාමිකයන්ගේ ප්‍රමාණය හයලක්ෂ හැත්තෑ දෙදහසක ප්‍රමාණය ඉක්මවා ගොස් තිබේ. පසුගිය වසර පහක පමණ කාලය තුළ 157,000 කට ආසන්න විශ්‍රාමිකයන් ප්‍රමාණයක් අප පවුලට එක් වී ඇති අතර විශ්‍රාම වැටුප් දෙපාර්තමේන්තුවේ වගකීම් සම්භාරය වැඩි කරමින් ඉදිරියේ දී තව දුරටත් පුළුල් වනු ඇත.විශ්‍රාම වැටුප් දෙපාර්තමේන්තුව මෙරට සමාජ ආරක්ෂණයේ දැවැන්ත භූමිකාවක් ඉටු කරමින් වර්තමාන මෙන්ම අනාගත විශ්‍රාමිකයා කෙරෙහි ද විශිෂ්ඨ සේවාවක් ඉටු කිරීම සඳහා සැලසුම් සකස් කරමින් සිටින අතර දෙපාර්තමේන්තුවේ නව්‍යකරණයන් සියල්ල එම පුරෝකථනයේ ප්‍රතිඵලයක් වේ.

වසර 2020 සහ 2021 කාලය කොවිඩ්-19 වසංගත තත්තවය හේතුවෙන් අභියෝග සහ දුෂ්කරතා රැසකට මුහුණ දීමට සිදු වූ කාල වකවානුවකි.කොවිඩ්-19 වසංගතයේ තුන්වෙනි රැල්ල හේතුවෙන් උද්ගත වූ තත්ත්වය හමුවේ නැවත වතාවක් රට වසා දැමීමට සිදුවු අතර එම අවස්ථාවේ විශ්‍රාම වැටුප් දෙපාර්තමේන්තුවේ නිලධාරින් බොහෝ ප්‍රමාණයක් ද කොවිඩ්-19 වෛරසයට ගොදුරු විය. එම දුෂ්කර අවස්ථාවේ වුවත් විශ්‍රාම වැටුප දිනකින් හෝ ප්‍රමාද නොවන අයුරින් විශ්‍රාමිකයන් අතට පත් කිරීමට විශ්‍රාම වැටුප් දෙපාර්තමේන්තුව ට උපරිමයෙන් කටයුතු කිරීමට හැකි වීම පිළිබඳ විශ්‍රාම වැටුප් අධ්‍යක්ෂ ජනරාල්වරයා ලෙස මා තුළ ඇත්තේ අප්‍රමාණ සතුටකි.ඒ වෙනුවෙන් කැප වුණු දෙපාර්තමේන්තුවේ ප්‍රධාන කාර්යාලයේ රාජකාරී කරන මෙන්ම දිස්ත්‍රික් ලේකම් කාර්යලයන් හි සහ ප්‍රාදේශීය ලේකම් කාර්යාලයන් හි විශ්‍රාම වැටුප් විෂය භාර ව කටයුතු කරන සියලුම නිලධාරීන් වෙත කෘතඥතාවය පළ කිරීමට ද මෙය අවස්ථාවක් කර ගනිමි.

ශ්‍රී ලංකා පුරවැසියකුගේ උපතේ දී ආයු අපේක්ෂාව වැඩි වීම සාපේක්ෂව ඉහළ යාම හේතුවෙන් ඉදිරියේ දී ශ්‍රී ලංකාවේ වැඩිහිටි ජනගහණය ශීඝ්‍රයෙන් වැඩිවීමට නියමිතය. ඊට සාපේක්ෂව අනාගතයේ දී  රටේ ශ්‍රම බලකායේ තරුණ සහභාගීත්වය අඩු වනු ඇත. මෙකී තත්ත්වයන් සැලකිල්ලට ගනිමින් මෙරට වැඩිහිටි ප්‍රජාව ශ්‍රම බලකායට දායක කර ගැනීම සඳහා විශ්‍රාම ගැන්වීමේ වයස් සීමාව දීර්ඝ කිරීමට රජය කටයුතු කිරීම පසු ගිය වසරේ ගත් වැදගත් ප්‍රතිපත්තිමය තීන්දුවකි. ඒ අනුව වර්තමාන රාජ්‍ය සේවකයන්ට සිය ශ්‍රමය වැඩි කාලයක් රාජ්‍ය වෙනුවෙන් ලබා දීමට අවස්ථාව හිමි වී තිබේ. විශ්‍රාම වියට පා තැබූ ඔබට ද තවදුරත් ඔබේ ශ්‍රමය දැනුම,පරිචය සහ කාලය රාජ්‍ය වෙනුවෙන් පිරිනැමිය හැකිය.විශ්‍රාම වියට එලැඹීම යනු දුබලතාවයට පත් වීම යැයි ද අසරණවීමක් යැයි ද හඳුන්වා දෙන විවිධ සංවිධානයන් හි මතවාද කර පින්නා නොගත යුතුව ඇත.

රටක ඉතිරි කිරීම් හා ආයෝජන වැඩිවීම රටක සංවර්ධනයට සෘජුව බලපාන්නකි.විවිධ ආයෝජන අවස්ථාවන් වෙත යොමු වෙමින් පෞද්ගලිකව මෙන්ම රටේ ආර්ථිකයට ද ශක්තියක් වීමට ඔබට හැකියාව තිබේ.

නව වසරේ නව උදාව ඔබේ ජීවිතයට මෙන්ම රටට ද ආලෝකයක් කර ගනිමින් නව ආර්ථික අවස්ථා පිළිබඳ අවධානය යොමු කර වැඩි වැඩියෙන් වැඩ කර රට තාවකාලික ආර්ථික අභියෝගයකට මුහුණ දී අවස්ථාවේ හැකි තාක් ඔබේ දැනුම පරිචය සහ අත්දැකීම් ආර්ථික සමාජයීය සංවර්ධනය වෙනුවෙන් ලබා දීමට කටයුතු කරන ලෙස ඉල්ලමි.

උදා වූ නව වසර ඔබ සැමට නිදුක් නීරෝගී සෞභාග්‍යමත් නව වසරක් වේවා!

නවතම පුවත් සහ සිදුවීම්