නවතම පුවත් සහ සිදුවීම්

අභියෝගාත්මක 2020..

විනය ගරුක නීති ගරුක සෞඛ්‍ය සම්පන්න සමාජයක්,ඵලදායී පුරවැසියෙක්,සතුටින් ජීවත්වන පවුලක් නිර්මාණය කිරීම මෙන්ම තිරසර භෞතික සම්පත් සංවර්ධනය කිරීම තුළින් ජනතාව කේන්ද්‍ර කරගත් ආර්ථිකයක් සහ පරිසර කළමනාකරණය ඔස්සේ රට හදන සෞභාග්‍යයේ දැක්ම ප්‍රතිපත්ති ප්‍රකාශය ක්‍රියාත්මක කිරීම වෙනුවෙන් කැපවීමට ප්‍රතිඥා දෙමින් විශ්‍රාම වැටුප් දෙපාර්තමේන්තුව 2021.01.01 වැනි දින නව වසරේ රාජකාරී ආරම්භ කරනු ලැබිණි.

කොවිඩ්-19 පිළිබඳ සෞඛ්‍ය මාර්ගෝපදේශයන්ට මුල් තැන දෙමින් සම්ප්‍රදායානුකූලව ජාතික ධජය එසවීමෙන් ජාතික ගීය ගායනා කිරීමෙන්, රණවිරුවන් ඇතුළු දේශය වෙනුවෙන් දිවි පූජා කළ සියලු විරුවන් සිහිපත් කිරීමෙන් අනතුරුව ආගමික වතාවත් සිදු කිරීමට මෙහිදී කටයුතු කරනු ලැබිණි.  

ගතවූ වසර තුළ මුහුණ දීමට සිදු වූ සුවිශේෂී අභියෝගාත්මක වාතාවරණය තුළ පවා හයලක්ෂ හැටදහසක් ඉක්මවූ ශ්‍රී ලාංකික විශ්‍රාමික ප්‍රජාව වෙත අප්‍රමාදව සේවාවන් සැපයීමට විශ්‍රාම වැටුප් දෙපාර්තමේන්තුව විසින් කටයුතු කරන ලදී.රට මුළුමනින්ම වසා දැමුණු කාල සීමාවේදී පවා විශ්‍රාමික පුරවැසියාගේ මූලික අයිතිය තහවුරු කරමින් රජයේ තීරණය පරිදි නියමිත දිනයටත් කලින් විශ්‍රාම වැටුප ලබා දීම වෙනුවෙන් විශ්‍රාම වැටුප් දෙපාර්තමේන්තුව සුවිශේෂී වැඩපිළිවෙළක් දියත් කරනු ලැබීය.

එම කාර්ය භාරයේ සාර්ථකත්වය කෙරෙහි විශ්‍රාම වැටුප් දෙපාර්තමේන්තුවේ සියලුම නිලධාරීන්,දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාලයන්ට අනුයුක්ත දෙපාර්තමේන්තුගත නිලධාරීන්ගෙන් සහ විශ්‍රාම වැටුප් ගෙවීමේ ක්‍රියාවලියට සහයෝගය දක්වන අනෙකුත් සියලුම නිලධාරින්ගෙන් ලැබුණු විශිෂ්ඨ දායකත්වය මෙහිදී ගෞරවයෙන් සිහිපත් කරමින් ස්තූතිය පළ කළ විශ්‍රාම වැටුප් අධ්‍යක්ෂ ජනරාල් ඒ.ජගත් ඩී ඩයස් මහතා පවතින අභියෝගාත්මක තත්ත්වය තුළ උවද විශ්‍රාම වැටුප් දෙපාර්තමේන්තුවේ ප්‍රධාන කාර්යාලයේ රාජකාරි කටයුතු සඳහා පැකිළීමකින් තොරව සේවයට පැමිණ සහාය ලබා දුන් කාර්ය මණ්ඩලය වෙත විශේෂ ස්තූතිය පළ කරනු ලැබූ අතර දෙපාර්තමේන්තුවේ සමස්ත කාර්ය මණ්ඩලය සහ ශ්‍රී ලංකා වාසී සමස්ත විශ්‍රාමික ප්‍රජාවට 2021 නිදුක් නීරෝගී සාමකාමී නව වසරක් වේවායි සුභාශිංසන එක් කරන ලදී.

 'ශ්‍රී ලංකා විශ්‍රාම' ග්‍රන්ථය නිකුත් වේ

වසර 1970 දී ‘A’ ශ්‍රේණියේ දෙපාර්තමේන්තුවක් ලෙස ශ්‍රී ලාංකික විශ්‍රාමික ප්‍රජාවගේ ප්‍රතිලාභ තහවුරු කිරීමේ අරමුණින් පිහිට වූ විශ්‍රාම වැටුප් දෙපාර්තමේන්තුවේ ගමන් මඟට අඩසියවසක් සපිරීම අර්ථාන්විතව සැමරීම සඳහා විශ්‍රාම වැටුප් දෙපාර්තමේන්තුව වැඩසටහන් කිහිපයක් දියත් කළ අතර එහි එක් පියවරක් ලෙස 'ශ්‍රී ලංකා විශ්‍රාම' ග්‍රන්ථය 2020.10.08 වැනි දින රජයේ ප්‍රවෘත්ති දෙපාර්තමේන්තුවේ පැවති විශේෂ මාධ්‍ය හමුවේ දී ගරු රාජ්‍ය සේවා පළාත් සභා සහ පළාත් පාලන අමාත්‍ය ජනක බණ්ඩාර තෙන්නකෝන් මැතිතුමන් සහ ගරු ජනමාධ්‍ය අමාත්‍ය කෙහෙළිය රඹුක්වැල්ල මැතිතුමන් වෙත පිරිනමන ලදී.

'ශ්‍රී ලංකා විශ්‍රාම' ග්‍රන්ථය මෙරට විශ්‍රාම වැටුප් ක්‍රමයේ විකාශය, විශ්‍රාම වැටුප් ගණනය කිරීමේ ක්‍රමවේදය, වැන්දඹු/වැන්දඹු පුරුෂ/හා අනත්දරු විශ්‍රාම වැටු ක්‍රමය,විශ්‍රාම වැටුප් දීමනා හා ප්‍රතිලාභ මෙන්ම විශ්‍රාමිකයන්ගේ සමාජ ආරක්ෂණය හා සුභ සාධනය උදෙසා වූ නවොත්පාදන වැඩසටහන් ඇතුළු විශ්‍රාම වැටුප් විෂය ක්ෂේත්‍රයේ සමස්තය අධ්‍යයනය කිරීමේ ප්‍රතිඵලයක් වේ. විශ්‍රාම වැටුප් හා බැඳුණු සෑම ක්ෂේත්‍රයක්ම ආවරණය වන පරිදි විද්‍යාත්මකව සකස් කරනු ලැබු පළමු ග්‍රන්ථය ලෙස මෙය විශ්‍රාම වැටුප් විෂය ක්ෂේත්‍රයේ මෙතෙක් පැවති රික්තයක් පූර්ණය කරනු ලබන්නකි.

වැඩිහිටි සමාජ ආරක්ෂණය පිළිබඳ පූර්වාදර්ශී මෙහෙවරක නිරත වන විශ්‍රාම වැටුප් දෙපාර්තමේන්තුවේ අඩසියවසක අත්දැකීම් සහ පරිචය ඔස්සේ මෙරට විශ්‍රාම වැටුප් ක්‍රමයේ දිශානතිය තීරණය කළ යුතු ආකාරය පිළිබඳ දෙපාර්තමේන්තු අධ්‍යයනයන් ද මෙම කෘතියේ අන්තර්ගත වේ.අතිගරු ජනාධිපති ගෝඨාභය රාජපක්ෂ මහතාගේ සෞභාග්‍යයේ දැක්ම ප්‍රතිපත්ති ප්‍රකාශය තුළ ද මෙරට විශ්‍රාම වැටුප් ක්‍රමයේ සුරක්ෂිතභාවය වෙනුවෙන් යෝජිත නව සංකල්පයන් කිහිපයක් ඉදිරිපත් වී තිබෙන අතර ඒ හා සමගාමී සමාජ කතිකාවකට මෙන්ම පුළුල් අධ්‍යයනයක් සඳහා මෙම කෘතිය මඟ පෙන්වීම් සිදු කරනු ලබයි.

විශ්‍රාම වැටුප් ක්‍රමය තුළ සේවය අවසන් කර විශ්‍රාම දිවියට එළැඹෙන විශ්‍රාමිකයා සෑම අතින්ම සුරක්ෂිත බව වසර 50 ක් ඉක්මවන විශ්‍රාම වැටුප් දෙපාර්තමේන්තුවේ ක්‍රියාකාරිත්වය තුළ නැවත නැවතත් තහවුරුකර දී තිබේ.එම සුරක්ෂිතභාවය රටේ සමස්ත ජනතාව වෙත තහවුරු කිරීම විශ්‍රාම වැටුප් දෙපාර්තමේන්තුවේ ඉදිරි දැක්මයි.ඒ අනුව දැනට විශ්‍රාම වැටුප් නොලබන සියලු දෙනාට සහභාගී විය හැකි සමාජ ආරක්ෂණ වැඩසටහනක් පිළිබඳව “සැමට විශ්‍රාම” (Pension for All) සංකල්පය ඔස්සේ විශ්‍රාම වැටුප් දෙපාර්තමේන්තුවෙන් මේ වන විටත් යෝජනා ඉදිරිපත් කර ඇති අතර ‘ශ්‍රී ලංකා විශ්‍රාම’ කෘතියෙහි මේ පිළිබඳ දෙපාර්තමේන්තුවේ පර්යේෂණාත්මක අධ්‍යයනයන් දීර්ඝ ලෙස සාකච්ඡාවට ලක් කර ඇත.