pic 1ජීවිත සහතික ලබා දීමේ පැරණි ක්‍රමවේදය වෙනුවට නව තාක්ෂණික ප්‍රවේශයක් හරහා එය සිදු කිරීමට පසු ගිය දා විශ්‍රාම වැටුප් දෙපාර්තමේන්තුව කටයුතු කරන ලදී.ඒ අනුව විශ්‍රාමික තොරතුරු සඳහන් ආකෘති පත්‍ර පිරවීමේ පැරණි ක්‍රමවේදය වෙනුවට ඇඟිලි සලකුණ භාවිත කරමින් සිය ජීවිත සහතික ලබා දීමේ නව ක්‍රමවේදයක් හඳුන්වා දුණි.

මෙම නව ක්‍රමය හරහා සෑම වසරකම ආරම්භයේ දී විශ්‍රාමිකයන්ට තමන් අයත් ප්‍රාදේශීය ලේකම් කාර්යාලයට ගොස් තම ඇඟිලි සලකුණ තබා ජීවිත සහතිකය ලබා දීමේ හැකියාව පවතී. ජීවිත සහතික ලබා ගැනීම සඳහා පූර්වයේ පැවති ක්‍රමවේදය අනුව විශ්‍රාමිකයන්ට ග්‍රාම නිලධාරීන් වෙතත් ප්‍රාදේශීය ලේකම් කාර්යාල වෙතත් යාමට සිදු වූ අතර එය දීර්ඝ කාල සීමාවක් ගතවන ක්‍රමයක් විය.නව ඇඟිලි සලකුණු ක්‍රමයේ දී විශ්‍රාමිකයන් හට ප්‍රාදේශීය ලේකම් කාර්යාලවලදී තත්පර කිහිපයක් තුළ ජීවිත සහතික ලබා දීමට මෙමඟින් පහසුව සලසා තිබීම විශේෂත්වය වේ. නවීන තොරතුරු තාක්ෂණික ක්‍රමවේදයක් තුළ ජෛවමිතික ක්‍රියාවලියක් ලෙසින් සිදු කරන මෙම ක්‍රමවේදය හරහා වඩාත් ඵලදායී සේවාවක් මෙරට විශ්‍රාමිකයන් විෂයෙහි තිළිණ කිරීමට විශ්‍රාම වැටුප් දෙපාර්තමේන්තුවට හැකියාව ලැබෙතැයි විශ්වාස කෙරේ.

දිවයින පුරා විසිරී ඇති ප්‍රාදේශීය ලේකම් කාර්යාල තුළ ස්ථාපිත කොට ඇති ඇඟිලි සටහන් යන්ත්‍ර මඟින් මෙම සේවාව විශ්‍රාමිකයන්ට ලබා ගැනීමට හැකියාව පවතින අතර පසුගිය දා Pan Asia බැංකුව ද දිවයින පුරා විසිරී ඇති සිය ශාඛා 40ක් මඟින් මෙම සේවාව නොමිලයේ මෙරට ජ්‍යෙෂ්ඨ පුරවැසියන්ට ලබා දීමට කටයුතු කරන ලදී.

ඒ සම්න්ධයෙන් අවබෝධතා ගිවිසුම අත්සන් කිරීම 2020.02.07 දා විශ්‍රාම වැටුප් දෙපාර්තමේන්තු ශ්‍රවණාගාරයේ දී සිදු කෙරිණි.

විශ්‍රාම වැටුප් අධ්‍යක්ෂ ජනරාල් ඒ ජගත් ඩී ඩයස් මහතා විශ්‍රාම වැටුප් දෙපාර්තමේන්තුව වෙනුවෙන් ද Pan Asia බැංකුවේ ප්‍රධාන විධායක නිලධාරි නිමල් තිලකරත්න මහතා Pan Asia බැංකුව වෙනුවෙන් ද ගිවිසුමට අත්සන් තබන ලදී.

මේ අවස්ථාවට බැංකුවේ ජ්‍යෙෂ්ඨ නියෝජ්‍ය සාමාන්‍යධිකාරී නලින් එදිරිසිංහ සහකාර සාමාන්‍යධිකාරි ජෙරල්ඩ් වනිගසේකර හා කළමනාකරු වින්ද්‍ය වික්‍රමගේ යන මහත්වරුන් ද විශ්‍රාම වැටුප් දෙපාර්තමේන්තුව වෙනුවෙන් අතිරේක විශ්‍රාම වැටුප් අධ්‍යක්ෂ ජනරාල් කේ. රවීන්ද්‍ර පත්මප්‍රිය, ප්‍රධාන ගණකාධිකාරී ඒ.ඩී.ටී.එන් අබේසිංහ, අධ්‍යක්ෂ පාලන රුසිත ධර්මසේන, අධ්‍යක්ෂ විශ්‍රාම වැටුප් බුද්ධික අමල් ජයතිස්ස යන නිලධාරීන් සහභාගී වූහ.









pic 1

සෑම වසරකම විශ්‍රාමිකයන් විසින් ග්‍රාම නිලධාරී මඟින් ලබා දිය යුතු ජීවිත සහතිකය නවීන තාක්ෂණය සමඟ මුසු කරමින් දැනට විශ්‍රාම වැටුප් දෙපාර්තමේන්තුව ආරම්භ කර ඇති ජෛවමිතික ක්‍රමයට ඇඟිලි සලකුණු ලබා ගැනීම සිදු කිරීම සඳහා අවශ්‍ය තාක්ෂණික උපකරණ ප්‍රාදේශීය ලේකම් කාර්යාල වෙත ලබා දීමේ වැඩසටහනෙහි දෙවැනි අදියර 2020.02.11 වන දින ගරු රාජ්‍ය කළමනාකරණ සහ ගිණුම් කටයුතු පිළිබඳ රාජ්‍ය අමාත්‍ය ලසන්ත අලගියවන්න මැතිතුමන්ගේ ප්‍රධානත්වයෙන් දෙපාර්තමේන්තු ශ්‍රවණාගරයේ දී පැවැත්විණි.

දිවයිනේ සියලුම ප්‍රාදේශීය ලේකම් කාර්යාල ආවරණය වන පරිදි ක්‍රියාත්මක කිරීමට අපේක්ෂිත මෙම වැඩසටහනෙහි දෙවැනි අදියර විශ්‍රාමිකයන් වැඩිම සංඛ්‍යාවක් සිටින ගම්පහ දිස්ත්‍රික්කයෙන් මේ වන විට ආරම්භ කර තිබේ.ගම්පහ දිස්ත්‍රික්කයෙහි සියලු ප්‍රාදේශීය ලේකම් කොට්ඨාස 13 ම ආවරණය වන පරිදි මෙම උපකරණ ලබා දීම ඒ අනුව සම්පූර්ණ වේ.ඉන් ප්‍රාදේශීය ලේකම් කාර්යාල 6 ක් සඳහා 2020.01.21 දින එම උපකරණ ලබා දී ඇති අතර එහි අවසාන පියවර වශයෙන් සෙසු ප්‍රාදේශීය ලේකම් කාර්යාල 7 සඳහා අදාළ උපකරණ අමාත්‍යතුමන් විසින් ලබා දීම මෙදින සිදු කෙරිණි.

මෙහිදී අදහස් දැක් වූ ගරු අමාත්‍යතුමන්, අතිගරු ජනාධිපති ගෝඨාභය රාජපක්ෂ මහතාගේ මඟ පෙන්වීම යටතේ ජනතාවට රජයෙන් ලබා දෙන සේවාවන් කාර්යක්ෂම කිරීම සඳහා වැඩසටහන් රැසක් ක්‍රියාත්මක වන බව සඳහන් කරන ලදී.ජීවිත සහතික සඳහා ඇඟිලි සලකුණු ලබා දීම තාක්ෂණය සමඟ මුසු කිරීම ද එම වැඩසටහන් අතර ඉදිරියෙන් සිටින වැඩසටහනක් බවත් පෙර පැවති සංකීර්ණ ස්වභාවය සරල වන බැවින් විශ්‍රාමිකයන්ට අපහසුවකින් තොරව ඉදිරියේ දී එම ක්‍රියාවලියට සහභාගී විය හැකි බවත් ප්‍රකාශ කර සිටියේය. තාක්ෂණමය වශයෙන් නිවැරදි සහතිකයක් ලබා ගැනීමට හැකියාව මෙමඟින් ලැබීම සුවිශේෂී කාරණයක් බව ද ප්‍රකාශ කළේය.

රාජ්‍ය ආයතන තාක්ෂණය සමඟ බද්ධ කිරීමේ ක්‍රියාවලිය විවිධ අභියෝග රැසකට මුහුණ දෙමින් ඉදිරියට ගෙන යන ක්‍රියාවලියක් වුවද රජයට වැය බරක් නොමැතිව මානව සම්පත විශිෂ්ඨ ලෙස කළමනාකරණය කරමින් විශ්‍රාම වැටුප් දෙපාර්තමේන්තුව තුළ සිදු කරන තාක්ෂණික පරිවර්තනය අගය කරන බව ද අමාත්‍යතුමන් මෙහිදී සඳහන් කරනු ලැබුවේය.

මේ මස 13 සහ 20 යන දිනයන්හි දී ලබා දුන් මෙම තාක්ෂණික උපකරණ යොදා ගනිමින් විශ්‍රාමිකයන්ගේ ඇඟිලි සලකුණ ලබා ගැනීමේ ක්‍රියාවලිය ගම්පහ දිස්ත්‍රික්කයේ ප්‍රාදේශීය ලේකම්කාර්යාලවලදී ගරු රාජ්‍ය අමාත්‍ය ලසන්ත අලගියවන්න මැතිතුමන්ගේ ප්‍රධානත්වයෙන් සංකේතවත් ලෙස ආරම්භ කරන බව ද මෙහි දී ප්‍රකාශ කරන ලදී.

ජීවිත සහතික ලබා දීම සඳහා ග්‍රාම නිලධාරීන් සහ ප්‍රාදේශීය ලේකම් කාර්යාල වෙත යාමට සිදු වූ පෙර පැවති ක්‍රමය වෙනස් කිරීමෙන් පසු නව ක්‍රමවේදය ඔස්සේ විශ්‍රාමිකයන්ට සිය ජීවිත සහතිකය ප්‍රාදේශීය ලේකම් කාර්යාලවලදී සුළු කාල සීමාවක් තුළ ලබා ගැනීමට හැකියාව ලැබී තිබේ. ජෛවමිතික ක්‍රමවේදයෙන් මෙසේ ජීවිත සහතිකය ලබා දීම සිදු කරනු ලබන්නේ 2016 ඔක්තෝම්බර් මාසයට පසු විශ්‍රාම ලැබූ, විශ්‍රාම ගැන්වීමේදී විශ්‍රාම වැටුප් දෙපාර්තමේන්තුවෙහි සත්කාර පියස සම්මුඛ පරීක්ෂණයට සහභාගී වී ඇඟිලි සලකුණු ලබා දී දෙපාර්තමේන්තු මධ්‍යගත දත්ත පද්ධතියට දැනට ඇතුළත් වී සිටින විශ්‍රාමිකයන්ට පමණි. 2016 ට පෙර විශ්‍රාම ලැබූවන් මෙම ක්‍රමවේදයට ඇතුළත් කිරීම සඳහා ඉදිරියේ දී විධිමත් වැඩපිළිවෙලක් සැකසීම සිදු කෙරෙනු ඇත.

ප්‍රාදේශීය ලේකම් කාර්යාල හරහා මෙන්ම මෙම ඇඟිලි සලකුණු ලබා දීම රාජ්‍ය හා පෞද්ගලික බැංකු ජාලය හරහා ද සිදු කිරීමට නියමිතය. එහි පළමු අදියර Pan Asia බැංකුවෙහි දිවයින පුරා පිහිටි ශාඛා 40ක් ආවරණය පරිදි සිදු කිරීම ද විශ්‍රාම වැටුප් දෙපාර්තමේන්තුව සහ Pan Asia බැංකුව අතර එකඟතාවය අනුව මීට සමගාමීව ආරම්භ වීමට නියමිතය.

මෙම අවස්ථාවට කළමනාකරණ සහ ගිණුම් කටයුතු රාජ්‍ය අමාත්‍ය ලසන්ත අලගියවන්න මැතිතුමන්,ගම්පහ දිස්තික්ක ප්‍රාදේශීය ලේකම් වරුන්,විශ්‍රාම වැටුප් අධ්‍යක්ෂ ජනරාල් ඒ.ජගත් ඩී. ඩයස් මහතා,අතිරේක විශ්‍රාම වැටුප් අධ්‍යක්ෂ ජනරාල් කේ.ආර් පත්මප්‍රිය මහතා,ප්‍රධාන ගණකාධිකාරී ඒ.ඩී.ටී.එන් අබේසිංහ මහතා ඇතුළු මාණ්ඩලික නිලාධාරීන් රැසක් සහභාගී විය.

pic 1

නව රජයේ ප්‍රතිපත්ති මාලාව වන සෞභාග්‍යයේ දැක්ම ප්‍රතිපත්ති ප්‍රකාශනයේ සඳහන් කරුණු සාක්ශාත් කරමින් රාජ්‍ය සේවය වඩා කාර්යක්ෂම හා නිරවද්‍ය කිරීම සඳහා තොරතුරු තාක්ෂණය භාවිතාව බහුල කිරීම යටතේ විශ්‍රාම වැටුප් දෙපාර්තමේන්තුව තවත් එක පියවරක් අද දින (2020-01-20) දින සනිටුහන් කරනු ලැබිණ.

ඒ යටතේ විශ්‍රාමික ජිවිත සහතික ලබා දීම නවීන තාක්ෂණය භාවිතා කරමින් ඇගිලි සලකුණු මාර්ගයෙන් සිදු කිරීම දිවයින පුරා නියමු ව්‍යාපෘතියක් ලෙස  ක්‍රියාත්මක කිරීම ගරු රාජ්‍ය පරිපාලන, ස්වදේශ කටයුතු හා පළාත් පාලන අමාත්‍ය ජනක බණ්ඩාර තෙන්නකෝන් මැතිතුමා හා ගරු රාජ්‍ය පරිපාලන රාජ්‍ය අමාත්‍ය ලසන්ත අලගියවන්න මැතිතුමාගේ ප්‍රධානත්වයෙන් ආරම්භ විය.

එහිදී ඇගිලි සලකුණු මගින් ජිවිත සහතිකය ලබා දීමේ අවස්තාව සංකේතවත් කරමින් විශ්‍රාමික නිලධාරිනියකගේ ජිවිත සහතිකය තාක්ෂණය උපයෝගී කරගනිමින් තහවුරු කිරීම සිදු විය. ඉන් අනතුරුව, මෙම කටයුත්ත දිවයින පුරා ආරම්භ කර පවත්වාගෙන යාම සඳහා අවශ්‍ය වන තාක්ෂණික උපාංග ප්‍රාදේශීය ලේකම් කාර්යාල වෙත ලබා දීම සංකේතවත් කරමින් ගරු අමාත්‍යතුමා විසින් ප්‍රාදේශීය ලේකම් කාර්යාල පහකට උපකරණ ලබා දෙන ලදී. 

උත්සවයේදී අදහස් දැක්වූ ගරු රාජ්‍ය අමාත්‍ය ලසන්ත අලගියවන්න මැතිතුමා විශ්‍රාම වැටුප් දෙපාර්තමේන්තුවට සහ විශේෂයෙන්ම එහි තොරතුරු තාක්ෂණ අංශයට සිය විශේෂ ස්තුතිය සහ සතුට පල කරන ලදී. එසේම විශ්‍රාම වැටුප් දෙපාර්තමේන්තුව විසින් සෞභාග්‍යයේ දැක්ම ප්‍රතිපත්ති මාලාව සාර්ථක කරගැනීමෙහිලා  සිදු කරන වැඩසටහන් ඉතා අගය කරන ලදී. විශේෂයෙන්ම දෙපාර්තමේන්තුව වෙත පැමිණෙන සේවාලාභීන්ට කිසිඳු ප්‍රමාදයකින් තොරව තම සේවා ලබා ගැනීමට සකස් කර අති ක්‍රමවේදය එතුමා විසින් අගය කරන ලද අතරම තවදුරටත් සේවා ලාභී තෘප්තිය මැනීමේ වැදගත්කමද පෙන්වාදෙන ලදී.

එසේම රාජ්‍ය පරිපාලන, ස්වදේශ කටයුතු හා පළාත්පාලන අමාත්‍යංශයේ ලේකම් සිරි හෙට්ටිආරච්චි මහතා අදහස් දක්වමින් අතිගරු ජනාධිපතිතුමා විසින් පසුගිය සතියේ සියලුම රාජ්‍ය ආයතන ප්‍රධානින් කැඳවා රාජ්‍ය සේවය කාර්යක්ෂම හා මහජන හිතවාදී සේවාවක් බවට පත් කිරීම සඳහා තොරතුරු තාක්ෂණය යොදා ගැනීමේ වැදගත්කම පෙන්වා දෙන ලද බවත් එහිදී ද විශ්‍රාම වැටුප් දෙපාර්තමේන්තුව ගෙන යන ක්‍රියාපිළිවෙත් ඇගයීමට ලක්වුණ බවත් ප්‍රකාශ කරන ලදී. එසේම රාජ්‍ය පරිපාලන හා ස්වදේශ කටයුතු රාජ්‍ය අමාත්‍යංශයේ ලේකම්වරයා අදහස් දක්වමින් සිය අමාත්‍යංශය යටතේ වන රාජ්‍ය ආයතන 7 ට රාජ්‍ය සේවය නගා සිටුවීම සඳහා ඉතා වැදගත් කාර්යභාරයක් පැවරී අති බවත් ඒ සඳහා කැපවීමෙන් කටයුතු කරන ලෙසත් පැවසිය.

විශ්‍රාම වැටුප් ගෙවීම් ක්‍රියාලවලිය නියාමනය කිරීමේ එක වැදගත් අංගයක් ලෙස වාර්ෂික විශ්‍රාමික ජිවිත සහතිකය ලබා ගැනීම සැලකේ. මෙමගින්, විශ්‍රාමිකයාගේ තොරතුරු තහවුරු කර ගැනීම හා විශ්‍රාමිකයා මිය යාමෙන් පසුව ඒ සම්බන්ධයෙන් විශ්‍රාම වැටුප් දෙපාර්තමේන්තුව දැනුවත් නොකිරීම හේතුවෙන් සිදුවන වැඩිපුර ගෙවීම් අවම කර ගැනීම මෙම ක්‍රියාවලියේ ප්‍රධානම අරමුනයි.

සෑම වසරකම ජනවාරි පළමුවනදා සිට මාර්තු 31 වනදා දක්වා කාලය විශ්‍රාමික ජිවිත සහතික ලබා ගැනීමේ කාලය ලෙස නම් කර ඇත. ඒ අනුව 2020 වසරට අදාලව දිවයින පුරා විසිරි සිටින විශ්‍රාම වැටුප් ලාභින් 641,000 ක් තම පදිංචිය සනාත කරමින් ග්‍රාම නිලධාරී හරහා ජිවිත සහතික ලබා දීමට නියමිතය. ඒ අනුව සියලුම විශ්‍රාමිකයින් වෙත ජිවිත සහතික අයදුම්පතක් තැපැල් මගින් යොමු කරනු ලබන අතර එම අයදුම්පත්‍රය සම්පුර්ණ කර ග්‍රාම නිලධාරී මගින් සහතික කර ප්‍රාදේශීය ලේකම් කාර්යාලය වෙත ලබා දිය යුතුය. පැරණි ක්‍රමය යටතේ එකතු කරගන්න ලද තොරතුරු නැවත විශ්‍රාම වැටුප් ගෙවීම් කළමනාකරණ පද්ධතියේ යාවත්කාලින කිරීම ප්‍රාදේශීය ලේකම් කාර්යාලමගින් සිදු කරනු ලැබිණි. ඒ සඳහා විශාල කාලයක් හා මුදලක් වැය විණි.

නව ක්‍රමවේදය යටතේ විශ්‍රාමිකයන්ට කිසිදු අයදුම්පත් පිරවිමකින් තොරව තම ඇඟිලි සලකුණ පමණක් භාවිතයෙන් තම ජිවිත සහතිකය ලබා දීමේ අවස්තාව උදා කර දී ඇත. ඒ අනුව මුලික අදියර යටතේ 2016-01-01 ට පසු විශ්‍රාම ගිය විශ්‍රාමිකයන් සඳහා මෙම ක්‍රමවේදය 2020 වර්ෂයේ ක්‍රියාත්මක කිරීමට නියමිතය. ඒ අනුව අදාළ පහසුකම ලබා ගත හැකි ඕනෑම ප්‍රාදේශීය ලේකම් කාර්යාලයකින් මෙම පහසුකම ලබා ගැනීමේ හැකියාව විශ්‍රාමිකයාට සැලසෙන අතර ව්‍යාපෘතිය ක්‍රියාත්මක වන ප්‍රාදේශීය ලේකම් කාර්යාල වලට අමතරව ඒ සඳහා අවසරලත් රාජ්‍ය හා පෞද්ගලික බැංකු ශාඛාවන් මගින්ද ඇගිළි සලකුණ මගින් ජිවිත සහතික ලබා දීමේ පහසුකම ලබා ගැනීමට විශ්‍රාමිකයාට අවස්තාව සැලසෙනු ඇත.

ඒ අනුව මෙම වැඩසටහන යටතේ රජයට වාර්ෂිකව ඉතා විශාල පිරිවැයක් ඉතිරි වන අතර විශ්‍රාම වැටුප් ගෙවීම් ක්‍රියාවලිය තවදුරටත් නිරවද්‍ය වීම තුලින් සිදුවිය හැකි වංචා අවම කිරීමක්ද සිදු වනු ඇත. තවද, මේ සඳහා අවශ්‍ය කරන මෘදුකාංග  විශ්‍රාම වැටුප් දෙපාර්තමේන්තුවේ තොරතුරු තාක්ෂණ අංශය හා වාණිජ බැංකු හා පෞද්ගලික අංශයේ ආයතන එක්ව නිපදවා ඇති අතර රජයට කිසිඳු වැය බරක් නොමැතිව අදාළ කටයුතු සිදු කර තිබීම ද විශේෂත්වයකි.

උත්සවය අවසානයේ ගරු රාජ්‍ය අමාත්‍ය ලසන්ත අලගියවන්න මැතිතුමා විශ්‍රාම වැටුප් දෙපාර්තමේන්තුවේ තොරතුරු තාක්ෂණ අංශය නිරීක්ෂණය කරන ලද අතර නවීන තාක්ෂණය භාවිතා කරමින් අභියෝගාත්මක ඉලක්ක ජය ගැනීම සඳහා නායකත්වය සැපයු ශ්‍රී ලංකා පරිපාලන සේවයේ නිලධාරීන්, ශ්‍රී ලංකා තොරතුරු තාක්ෂණ සේවයේ නිලධාරීන්ට සහ තොරතුරු තාක්ෂණ අංශයේ සියලුම දෙනාට සුබ පැතුම් එකතු කරන ලදී.